《SLAM》50大排名：Lonzo Ball排名第45位

文：MenClub 波特先生　　圖：互聯網
POSTED ON 18 Sep 2017

近日，美國著名籃球雜誌《SLAM》陸續評選出新一季NBA 50大球星排名，其中湖人新希望Lonzo Ball作為仲未喺NBA打過一場嘅新秀身份成功入選，排名第45位。唔知對於呢個排名，你又認唔認同呢？

Ball可以話喺2017年籃球圈入面嘅話題人物，首先佢嘅個人籃球技術當然相當出眾，但係令到佢為全世界人所認識嘅卻唔係佢嘅籃球技術，而係佢嘅父親LaVar Ball。呢位「非常父親」可以話喺為左令到佢個仔Lonzo話題不斷，無論咩人都唔怕得罪，就算係Michael Jordan、LeBron James、Stephen Curry、Russell Westbrook等巨星都被呢位父親利用，以呢班巨星作為話題黎推銷佢呢位兒子。

最終，LaVar嘅策略可以話相當成功，湖人今年以榜眼簽同Lonzo Ball正式簽約，可以話天時地利人和都完全岩晒LaVar Ball嘅預期，因為目前嘅湖人欠缺巨星，Lonzo Ball嘅上陣機會將唔會受到限制，而湖人所在嘅洛杉機又係美國大城市，市場之大將絕對可以滿足LaVar。

而加入湖人後，Lonzo Ball率先喺夏季聯賽大顯身手，佢成功展現出自己嘅長處，利用精彩嘅助攻帶領湖人成功勇奪賽事冠軍，而佢本人亦順理成章奪得賽事MVP，雖然夏季聯賽同NBA賽事完全唔同層次，只可以作為一個參考，但係喺比賽入面都可以睇到佢擁有提升隊友們實力嘅能力，而呢一點都足以令湖人球迷相當興奮。

而透過夏季聯賽，我地可以更加認識到Lonzo Ball呢位湖人未來希望以下幾點： 1、佢係一名無私嘅球員，佢嘅隊友同佢一齊打波會有很多樂趣 2、佢會喺比賽入面至少出現1－2次足以令你大喊：「嘩！」嘅鏡頭 3、佢需要提升跳投能力，但呢一點其實93％嘅新秀都需要留意 4、佢嘅潛力相當相當高，佢就好似Jason Kidd同Penny Hardaway嘅混合體一樣 5、佢喺新球季將會喺排名第45位嘅球員，然後喺接落黎幾年排名會繼續升高

而今次50大球星排名比Lonzo Ball更低嘅球員，分別有： 46、Jrue Holiday 47、Harrison Barnes 48、Brook Lopez 49、Ben Simmons 50、Dion Waiters

雖然Lonzo Ball嘅能力已經獲得外界唔少肯定，不過預計其新秀賽季最大嘅挑戰者將會喺今次排名第49位嘅76人狀元Ben Simmons，雖然身高上兩者有啲差距，但係預計兩人都會喺各自球隊嘅進攻組織者，所以佢地喺新球季必定會不斷被拿來作對比，甚至最佳新秀一獎將好大機會喺佢地兩位之爭。