作為世界最出色嘅球員之一，特別係前鋒線上最強嘅尖刀，C朗拿度嘅門前把握力及入球能力可以話係舉世無雙。不過生涯咁長時間，C朗拿度還是曾面對唔少世界級後衛，而當中最令C朗頭痛嘅一位，就係著名英格蘭後衛艾殊利高爾。

黎緊歐聯決賽中，C朗將會面對利物浦嘅26歲後衛雲迪克，究竟後者能唔能夠限制C朗嘅威脅？定係會被C朗完全打垮呢？呢一點將成為賽事嘅其中一個焦點。

而日前，C朗接受訪問時被問到其生涯當中最難應付嘅後衛係邊一位，佢好快就給出呢個答案，就係英格蘭人艾殊利高爾。

當C朗仲喺英超效力曼聯嘅時候，佢曾多次對上艾殊利高爾，由於當時C朗仍然更多踢右翼位置，所以無論高爾係效力阿仙奴還是車路士，佢都會面對住呢位左後衛。而C朗承認，面對高爾係非常困難嘅時刻。

如今高爾已經離開歐洲主要聯賽，轉到美國大聯盟繼續職業生涯，而C朗則繼續係世界最出色嘅球員之一，並繼續面對住唔同後衛嘅攔截。而能夠令C朗印象咁深刻，可以想像當年嘅高爾喺防守上究竟有幾出色，所以先有評論指當時巔峰嘅高爾係世界最出色嘅左後衛。