相信唔少有番咁上下年資嘅球迷，都見證住自己以往睇嘅球星慢慢退落黎，甚至已經退役。較早前利物浦傳奇「神奇隊長」謝拉特已經入主蘇超強隊球隊格拉斯哥流浪，成為佢地嘅領隊。而作為「神奇隊長」昔日英格蘭嘅好戰友，人稱「雙特」之一嘅前車路士傳奇中場「鐵人」林伯特日前亦繼謝拉特腳步，入主英冠球隊打比郡，成為球隊領隊！

作為三屆英超冠軍嘅成員，今次係林伯特退役後首次擔任起領隊角色，並且雙方一簽就係一份三年期嘅合同。

林伯特今次成功擔任打比郡領隊，係因為原來嘅領隊Gary Rowett轉投岩岩喺英超降班嘅史篤城，所以位置因此騰空左出黎。

對於能夠加入打比郡，林伯特表示自己一直都希望可以執教一支好似打比郡一樣擁有長久歷史嘅球隊，所以今次係一個極好嘅機會。

其實喺岩岩一季入面，打比郡成功奪得聯賽第6名，並獲得升班附加賽嘅資格，但喺4強卻不敵富咸所以未能升班。

雖然今次係林伯特首次擔任教練一角，但佢覺得自己因為以往曾同世界級嘅領隊共事，所以對自己嘅能力及球隊都充滿信心。

如果林伯特可以交到功課，未來絕對有機會成為英超球隊嘅領隊，甚至未來可能大家會再次見到林伯特vs謝拉特，但卻係以教練身份喺球場上碰上。