比賽精華

日前，皇馬喺主場班拿貝球場舉行左一場老將慈善賽，除左一班皇馬前球星之外，對手則搵黎英超球隊阿仙奴嘅一班前球星，現場可謂星光熠熠，位位都係昔日球場上嘅超級球星。

皇馬方面，前鋒線上有昔日金童魯爾，仲有以往嘅好拍檔古迪，中場有費高、施多夫、沙比阿朗素、巴迪斯達等，後防就梗係有傳奇左閘羅拔圖卡路士，另外仲有摩連迪斯、杜迪克等人，而後備席上亦有朗拿度嘅身影，不過佢未有上陣。

阿仙奴方面則有安歷卡、皮利斯、般莫迪、蘇金寶、比堤、溫特本、門將施文等，兩軍對戰雖然大家都老啦，不過仍然可以睇到佢地爐火純青嘅技術，真係相當精彩。

而其中皇馬攻入嘅第一球，左路由卡路士邊線完美斬中，魯爾一個獅子搖頭，球喺龍門上方直飛入網。魯爾呢個入球如果唔話你知，你可能真係會以為係以前嘅片段，因為真係完美體現出佢嘅頭搥技術，如果有踢開波頂過頭搥嘅應該就會明白當中嘅難度。

其後到阿仙奴一次進攻，皮利斯喺中場一個直線成功劏開皇馬防線，般莫迪無人看管下單刀面對門將，最終射近柱下成功追成平手。不過其實當時禁區中間有安歷卡喺度，但係佢就非常獨食咁自己射左佢。

之後皇馬又黎一次精彩配合，古迪成功同巴迪斯達黎一次one two，最終呢位中場更巧妙避開防守球員，然後勁射破網，2:1。

最終雙方再無入球下，皇馬以2:1擊敗阿仙奴，當然比分並唔重要，重要嘅係為慈善出一分力，同埋球迷們可以再見到呢班傳奇球星多一面！