日前，NBA已經舉行左一年一度嘅選秀大會，亦即係話去年嘅一班新秀已經唔再係新秀，佢地作為二年生理應交出更令球隊滿意嘅表現，其中作為去年選秀狀元嘅Markelle Fultz則更需要去證明自己，否則隨時被冠以水貨狀元嘅稱號！

去年嘅NBA新秀出色嘅表現，被外界評為係繼2003年白金一代後最出色嘅一班新秀，好似塞爾特人嘅Jayson Tatum、爵士嘅Donovan Mitchell、湖人嘅Lonzo Ball及Kyle Kuzma、公牛嘅Lauri Markkanen、獨行俠嘅Dennis Smith Jr.等等，唔少都已經成為球隊嘅主力，甚至有機會成為建隊基石。

不過可惜嘅係，貴為呢一屆新秀嘅狀元Fultz，卻因為肩部受傷問題差唔多全季報銷，岩岩一季就只係上陣左14場常規賽，平均只有18.1分鐘上陣時間，可以拎到7.1分3.8助攻，表現絕對被一班同期比下去。

而更令Futlz沮喪嘅係，近日有消息指佢患上「投籃失憶症」，亦即係話佢每次投籃嘅時候都會不由自主受自身影響，嚴重阻礙其投籃。正因為咁，球迷們先會見到佢投射罰球時嘅動作變得奇怪，原來唔係因為受傷，而係因為怪病纏身。

Fultz作為狀元，76人當然對佢有唔少期望，但係眼見球隊內已經有Ben Simmons及Joel Embiid兩位基石，所以有消息指其實76人去年曾有意將Futlz交易掉。如今Futlz突然又確診身患怪病，所以佢喺NBA嘅未來已經變得相當不確定。

雖然係咁，Futlz並未有被呢啲負面消息影響，並且用用實力去回應呢啲質疑。日前，佢就拍左一段自己控球上籃嘅片段，可以睇到佢嘅控球非常熟練及銷魂，睇黎佢想用呢一點去表達雖然自己嘅投射有問題，但佢仍然係一名出色嘅球員，並且可以用運球去擊倒你！