能夠為國家奪得世界盃冠軍相信係所有球員最大嘅夢想，相信如果有機會奪冠可能有部份球員係連條命都可以唔要。不過，有時候球會同國家隊會處於對立嘅局面，甚至影響球員喺世界盃嘅上陣情況，而阿根廷球星迪馬利亞就係其中一位受害者。

目前效力緊巴黎聖日耳門嘅阿根廷翼鋒迪馬利亞，日前就爆料指責前球隊皇家馬德里嘅行為，令佢錯失喺2014年世界盃決賽中上陣。

上屆巴西世界盃，阿根廷成功打入決賽面對德國隊，本來可以上陣嘅迪馬利亞卻因為喺四強時嘅受傷，被皇馬勒令佢唔准上陣，導致佢喺世界盃決賽上陣，甚至奪冠嘅夢想完全破滅。

迪馬利亞回憶當時嘅情況，其隊醫拎住一封信走黎同佢講皇馬方面禁止佢喺世盃決賽中上陣，並迫使佢地要阻止迪馬利亞上陣參賽。聽到之後迪馬利亞完全不能接受，但係佢當刻已經知道究竟發生咩事，因為外界已經一直盛傳皇馬想喺世界盃後簽入占士洛迪古斯，而佢知道皇馬一定會將佢賣掉以騰出空間。

對於呢個情況，迪馬利亞亦都非常心水清，佢知道皇馬唔想佢地嘅資產有任何損傷，就係咁簡單。其後迪馬利亞叫隊醫將封信交比佢，而佢喺無睇之後將封信撕成碎片。

其後迪馬利亞搵阿根廷教練商討呢件事，佢同教練講：「我只想贏得世界盃，如果你將我放上陣，我就會全力比賽，直到你要我休息為止。」然後迪馬利亞就開始喊，佢完全控制唔到自己，因為佢完全無能為力。

決賽開始，迪馬利亞只能夠一直坐喺後備席，並見證自己嘅球隊落敗，對此佢感到無比失望，因為佢覺得佢地離世界盃冠軍已經非常接近！

黎到今屆，迪馬利亞有機會再次上陣，而佢亦已經唔係皇馬一員，並且球隊喺絕境之下喺比賽尾段成功鎖定勝利，成功奇蹟打入16強。雖然阿根廷被外界一致看淡，但係正所講「波係圓的」，無人能夠估計呢隊阿根廷會唔會繼續創造奇蹟，甚至完成上屆未能完成嘅夢想！