正所謂「一山不能藏二虎」，呢一邊廂皇馬一直對巴西球星尼馬虎視眈眈，甚至有傳佢地已經準備出天價3.1億歐元收購呢位岩岩帶領巴西隊殺入世界盃八強嘅前鋒。另一邊廂，既然尼馬有可能到來，而佢黎到又無可能唔做球隊新核心，咁即係舊有核心C朗拿度喺皇馬嘅日子亦可能迎來倒數，有見及此意甲冠軍祖雲達斯有意接手簽下呢位5屆金球獎得主！

據報導指，祖記方面準備向皇馬報價C朗拿度，佢地將會開出1.06億鎊轉會費，並為C朗開出4年合同。不過如果心水清嘅朋友都知道，C朗本身合同嘅違約金為10億歐元，所以如果皇馬真係要接受祖記嘅報價，佢地就要調低其違約金金額。

目前33歲嘅C朗，喺今屆世界盃個人攻入4球，帶領葡萄牙成功殺入16強，但好可惜不敵烏拉圭提前出局，相信今次出局亦好可能令佢緣盡世界盃，因為4年後嘅佢已經37歲，會否再入選都係未知之數。

不過，雖然C朗已經唔再後生，速度亦大不如前，但係佢喺面前嘅把握力仍然係世界級的，只要佢喺對方禁區就仍然係極巨威脅，再加上佢完美保持自己嘅狀態及體能，所以相信再踢兩三年佢仍然可以保持唔低嘅入球數。

另一個問題就係，皇馬對於C朗愛理不理，令C朗已經非常不滿，就算C朗帶領球隊連續三年奪得歐聯冠軍，又開晒聲想加薪，皇馬亦喺非常之唔願意下先為佢加少少，所以令C朗心灰意冷，如果祖記真係開出夠吸引嘅合同，相信C朗將會好大機會離隊他投。