設計對白：我要做教練呀！

作為上屆世界盃亞軍，阿根廷今屆世界盃可以話踢出令人失望嘅表現，佢地先喺外圍賽驚險出線，其後喺小組賽階段又喺面臨被淘汰下最後一輪先確保獲得一個次名出線資格，最終16強面對強大嘅法國以3:4飲恨出局。

作為擁有多位世界級中前場嘅球隊，阿根廷今屆踢出黎嘅足球完全係無組織，只係單靠球員個人能力去製造入球。而後防就更加可以用災難性黎形容，完全係前面入一球，後面失兩球嘅節奏。

而外界有唔少聲音都將阿根廷失敗嘅責任歸到智利藉教練Jorge Sampaoli身上，批評佢胡亂排陣，亦都唔識換人。而作為曾經帶領阿根廷奪得1986年世界盃冠軍嘅「球王」馬勒當拿，今屆亦親身到現場支持祖國，但最終卻親眼睇見國家隊表現咁差，令佢按奈不住有想出山再次執教阿根廷國家隊。

其實馬勒當拿早喺2010年世界盃已經執教過阿根廷，喺佢嘅帶領下國家隊成功打入八強，但最終卻以0:4不敵德國出局，其後佢亦宣佈落台。而今次，馬勒當拿想再次執起國家隊教鞭，佢更揚言可以免費做教練，唔使任何回報。

不過目前嘅Sampaoli同阿根廷國家隊嘅合同需要到2022年先會到期，除非阿根廷足總願意支付違約金，否則馬勒當拿想再次做阿根廷國家隊教練可能要再等4年。

設計對白：要我等4年咁耐？！