世界盃戰至現在，克羅地亞成功以黑馬身份殺入賽事四強，將會面對英格蘭爭入決賽！而一路走來，克羅地亞分別喺16強及8強憑住互射12碼成功淘汰對手晉級，當中嘅球隊英雄絕對非多次撲出對手12碼嘅門將Danijel Subasic莫屬。

喺面對丹麥嘅16強賽事，Subasic喺互射12碼階段3次撲出對手嘅射門，最終助球隊晉級。8強面對東道主俄羅斯，克羅地亞再次激戰120分鐘未能分勝負，互射12碼階段Subasic又一次拯救球隊，雖然今次佢只係撲到1球，但係都足以協球隊殺入四強！

而就喺擊敗丹麥一刻，Subasic非常興奮及激動，甚至流下男兒淚，佢除左同隊友慶祝之外，佢亦除左自己件衫，但係就唔係露出結實嘅肌肉，而係展示著住嘅另外一件印有24號嘅衫，並且上面有一張另一位球員嘅相片。

呢一位被Subasic著住喺身嘅人，原來係佢嘅好友Hrvoje Custic，二人曾經喺克羅地亞聯賽成為隊友，不過後者已經離開人世。Hrvoje Custic呢個名可能對於你黎講好陌生，不過如果你有上Youtube睇過，你可能都會睇過佢離世前受傷嘅片段。

2008年嘅一場比賽入面，Custic與對方一次爭球下，竟然不幸頭部撞上場邊嘅牆壁，佢隨即倒地不幸，救傷車及救護員即刻衝入場，雖然當時搶救成功，但最終因為細茵感染，捱左5日後都係離世。

如今，Subasic成為克羅地亞嘅首席門將，而摯友雖然不在人世，但係佢就希望可以帶上佢呢位兄弟一齊參加世界盃，去實現佢地兩個兒時嘅夢想。黎緊克羅地亞將會對上英格蘭，Subasic將繼續鎮守住球隊嘅大門，不過佢地唔係得Subasic一個人，而係仲有Custic嘅精神，一齊保住後方！