今年世界盃克羅地亞雖然不敵法國只能屈居亞軍，但係佢地陣中嘅核心摩迪卻表現驚豔，踢出中場大師嘅風範，最終毫無疑問地當選左世界盃金球獎得主。因此，皇馬喺今夏失去C朗拿度後，就決定新球季以摩迪作為球隊核心征戰，由此說明呢位中場嘅重要性。

雖然摩迪現年已經32歲，但眼見其表現仍然咁出色，所以仍然引黎其他球隊嘅追逐，其中包括意甲勁旅國際米蘭。當然，皇馬方面已經表明絕對唔會將摩迪賣走，而摩迪本人亦明言自己非常喜愛皇馬，所以國米要想搶人都唔係咁容易。

據消息指，國米向皇馬開出收購摩迪嘅方案如下：第一年先以1500萬歐元租借呢位中場，然後賽季結束後可以以2500萬歐元將其正式收購，亦即係話整個收購就只係4000萬歐元。對於一位即將33歲嘅球員黎講，4000萬歐元其實並唔係一個少數目(C朗係例外)，但係以現金球壇嘅轉會費情況，摩迪作為世界最佳中場之一，佢嘅轉會費應該唔至呢個價。睇番2012年夏天，皇馬以3000萬歐元從熱刺收購摩迪，黎到今日升值1000萬歐元。

當然，國米開出嘅收購方案並唔簡單，佢地唔係針對皇馬，而係摩迪，因為佢地為佢開出嘅合同簡直係難以抗拒。首先，摩迪會先喺國米踢4年，每年除稅後年薪達到1000萬歐元，其後會轉戰中超嘅江蘇蘇寧再踢兩年，而呢兩年年薪仍然係1000萬歐元一年，亦即係話摩迪將可以喺33-38歲呢6年期間保證搵到6000萬歐元人工。要知道宜家摩迪嘅除稅後週薪為18萬歐元，年薪大慨為930萬歐元，亦即係未來6年嘅人工都可以比喺皇馬更高更有保障。

而點解最後兩年會到中超？因為國米其實有70％股份係由江蘇蘇寧持有，所以喺呢位世界盃金球獎得主年紀可能唔太應付到頂級聯賽嘅時候送到中超，都未嘗唔係一個雙贏局面。更何況前車可鑑，皇馬從來都唔會善待功勳老將，其中包括C朗拿度、魯爾等名將都難以喺皇馬終老。所以，摩迪隨時喺2-3季後就會被皇馬棄用，屆時一切可能就會太遲。究竟摩迪呢位中場核心會唔會真係離開皇馬呢？皇馬會唔會一個夏天走晒兩大核心呢？