1. 陳浩南 鄭伊健飾 《古惑仔4之戰無不勝》

「點解入黑社會？巴閉囉，英雄主義，疊馬，我唔妥你，我可以逗你，我唔鍾意你，可以揼你。」呢段經典對白就算冇睇過《古惑仔4戰無不勝》都一定有聽人講過。戲中陳浩南因為想喺李嘉欣飾演嘅中學老師「欣欣」面前隱藏黑社會身份，自稱係補習社老師，後來仲被佢叫咗去代課，之後就出現以上經典一幕。雖然班學生到最後都聽唔入耳，但就表達咗陳浩南人在江湖，身不由己嘅無奈。順帶一提，當年嘅李嘉欣真係好靚女。

2. 化學老師 曾近榮飾 《逃學威龍》

講起以學校為背景嘅港產片，點可以唔提一年總會翻播一兩次嘅《逃學威龍》？由於係以學校做背景，所以入面有好多老師角色，例如秦沛飾演嘅訓導主任、苑瓊丹飾演嘅Miss Leung，但講到最令人記得嘅，就一定係由以故「哥士的王子」，現實中都已經係人稱「曾Sir」嘅曾近榮飾演嘅化學老師，「如果無記性，就好危險架啦！」真係睇字都有畫面。同時又順帶一提，當年嘅張敏都好靚女。

3. 張英 張家輝飾 《流氓師表》

「唔準搭我膊頭」
「你唔食我咪唔搭囉」
「你唔搭我咪唔食囉」
「你唔食我咪唔搭囉」
「你放手我咪掉囉」
「你掉我咪放手囉」
「你唔放手我點掉呀」
「你唔掉我點放手呀」
除咗當年嘅蒙嘉慧好靚女，我冇嘢補充啦。 

4. 陳俠 甄子丹飾《大師兄》

論戰鬥力可能名單中最高嘅一人，「宇宙最強」新戲《大師兄》中飾演回到母校任職嘅退伍軍人，以非常方法教導頑劣嘅學生，一睇就知劇情深受《麻辣教師GTO》影響。能否成為經典還需時間認證，但的確係甄子丹轉型之作。又又再順帶一提，陳喬恩依家都好靚女。

特別介紹 曾政良 陶大宇飾 《青出於藍》

OK，我知《青》係劇集唔係電影，但一講到「經典老師角色」，我哋好自然就開始「同學各位 找個位 這是你的開學禮」起來，堪稱近年(數一數都十四年前…)最青春嘅校園電視劇，陶大宇亦成經典老師角色。又又又順帶一提，當年嘅郭可盈都好靚女。