C朗拿度今個夏天離開皇馬轉投祖雲達斯，長達10年西甲嘅「美C」對決正式落幕，大家未來最多就只能夠喺歐聯再見到二人喺場上碰頭了。不過，要講兩位球星嘅對決又點只球場上，繼上次嘅遊艇對決，今次到二人嘅私人飛機了！

作為世界最頂級嘅球星，美斯及C朗嘅人工當然係天價，再加上不斷嘅廣告收入，兩位絕對擁有用之不盡嘅財富，遊艇又點可以滿足到佢地呀，擁有一部私人飛機先可以富顯佢地嘅身份。

美斯呢部Embraer Legacy總值2830萬歐元，平時係用黎比佢參加國際賽的及家庭旅行的。

同你所諗緊嘅一樣，美斯呢部私人飛機擁有無比奢華嘅設施，其中包括：設備齊全寬敞嘅廚房、大浴室、斜躺式真皮座椅。另外，該私人飛機有三個唔同嘅部分：一個帶兩張梳化床嘅私人區域，一個額外嘅洗手間及一個會議區。 呢部飛機可以同時容納12至14人。

C朗對品味嘅追求可能比美斯更高，咁花費當然就更高啦，佢呢部私人飛機盛惠3170萬歐元，係眾多球員當中價值最高的。

呢部G650擁有比美斯嘅Embraer Legacy更高嘅科技，其中包括：「三重飛行管理系統」、3D氣象雷達、高級飛行控制系統及緊急著陸動作系統。

而據消息指，C朗呢部私人飛機可以每2分鐘為機內補充100％新鮮空氣，以減少機內人士嘅疲勞感。飛機可容納18人，最高速度可以達到981km/h。