基利安麥巴比呢個名，相信經過世界盃後有更多球迷聽到過，雖然佢只係得19歲，但已經協助法國奪得世界盃，成就非凡！呢位射手唔單只速度快，入球能力了得，雖然間唔中都學左尼馬插水啲衰野，但就相當低調成熟，絕對係未來金球獎嘅大熱人選。

不過，唔知係咪「一朝得志 語無倫次」，麥巴比喺岩岩嘅法甲賽事入面，罕有地情緒失控被球證驅逐離場，下場將面臨停賽處罰。

巴黎聖日耳門喺面對尼姆嘅比賽，憑住尼馬、迪馬利亞、麥巴比及卡雲尼各入一球，以4：2擊敗對手，開季4戰全勝佔據榜首。其中麥巴比喺下半場32分鐘憑住自身速度及技術，成功接應隊友嘅長傳，再精彩破網，協助球隊再次領先對手，係球隊獲勝嘅功臣。

不過，喺比賽接近完場前，麥巴比被對方球員沙雲尼亞喺中圈附近撞低，其後呢位年輕球員即刻爬起身非常憤怒咁衝向對方，並雙手將對方重重咁推倒喺地下。球證見狀待雙方球員散開，先出示紅牌比踢人嘅沙雲尼亞及推人的麥巴比。

只可以講，麥巴比都係唔夠成熟，明知對方係危險動作，球證一定會有所行動，但佢就壓唔住自己嘅情緒，做出一個不智嘅行為，導致自己需要面臨停賽。雖然對方嘅犯規動作確實係非常惡劣，但係麥巴比咁憤怒卻與以往嘅成熟有點分別，深怕佢以為自己上左位，就可以喺球場上為所欲為。

當然，唔係話對方做咩你都要啞忍，喺適當嘅時候同球證投訴，甚至與對方有些許身體上嘅衝突都係可以的，但係咁樣推低對方就實在係愚蠢嘅行為。希望聖日耳門嘅教練能夠指導一下呢位年輕人，點一條正確嘅路比佢繼續行，繼續進步。