今年夏天，五屆金球獎得主C朗拿度決定離開皇馬，轉戰意甲加盟祖雲達斯，呢個消息可以話震驚球壇，特別係西甲聯賽嘅影響特別深遠。要知道C朗自從2009年由曼聯加盟皇馬後，與巴塞球星美斯形成「絕代雙驕」長達10年時間，亦可以話西甲係憑住佢地兩個去撐起。

如今C朗離隊後，皇馬前鋒線由賓施馬、巴利及阿辛斯奧撐起，表現其實相當好，甚至有啲撇甩「C朗依賴症」。不過，無左C朗嘅西甲，就好似少咁啲野咁，即使美斯仍然喺度，甚至表現持續高企。

對於C朗離開皇馬，離開西甲，作為其宿敵嘅美斯並未喺公開場合談論過，但日前佢終於開腔，講下對C朗嘅感受。

「皇馬係世界最佳球會之一，佢地擁有出色嘅陣容，但失去C朗無疑令佢地嘅實力受損。同時，C朗嘅加盟令祖雲達斯成為歐聯其中一支奪標大熱門。」

「(C朗離隊)令我感到驚訝，我無想像過佢會離開皇馬或加盟祖雲達斯。有好多球隊都想要佢。佢嘅離開令我意想不到，但佢如今已經加盟一支非常出色嘅球隊。」

C朗嘅離開令西甲成為美斯一個人嘅舞台，過去10年佢地兩個嘅對決相信帶比各位球迷唔少精彩時刻，其中C朗為皇馬上陣292場攻入311球，平均每場攻入1.065球，而美斯如果由C朗黎到西甲開始計，則為巴塞上陣312場攻入333球，平均每場攻入1.067球，數據上美斯都係輕輕領先C朗。不過，如今呢一切都已經成為過去，「美C」嘅對決就只剩下歐聯先有機會再次上演了。