C朗拿度貴為5屆金球獎得主，係目前世界最出色嘅球員之一，而真正能夠同佢平起平坐嘅就只有巴塞隆拿嘅大佬美斯。兩位最強球員一直喺西甲鬥左10年，直至今年C朗決定離開皇馬轉投祖雲達斯，呢個「美C」對決亦正式告終。

雖然「美C」對決將唔會再喺西甲上演，但係歐聯賽場及個人獎項方面，兩位球員都仲係有機會對上的，而今年FIFA最佳男子足球員獎項，美斯竟然被排除在三甲之外，相反C朗則繼續入圍三甲，最終亦奪得第二。

現年33歲嘅C朗拿度，理論上已經進入球員嘅黃昏期，但係佢嘅狀態卻仍然保持住世界級，而佢靠嘅並唔係自己與生俱來嘅足球天賦，而係靠住努力，係一份唔係常人對努力嘅執著。

究竟C朗有幾努力？C朗嘅一位表弟較早前就透露，當年C朗喺2008年為曼聯奪得歐聯冠軍後，竟然唔係休息或狂歡，而係獨自去訓練！

2008年，C朗仲係只有23歲，佢協助曼聯成功打入歐聯決賽，對手係同為英超球隊嘅車路士，最終雙方以12碼定勝負，雖然C朗自己射失12碼，但最終泰利因為跣腳射失，並安歷卡嘅射門被雲達沙救出，就係咁曼聯成功捧起歐聯獎盃，亦都係C朗生涯第一個歐聯冠軍。

正常黎講，如果贏得生涯第一個歐聯冠軍，一定會去好好慶祝一番，又或者先休息一晚，話晒大戰左120分鐘。不過，C朗原來回到曼徹斯特市後，竟然去左健身室進行訓練，記住當時嘅佢就只有23歲，一個年輕人竟然可以咁自律真係非常困難，而正正係因為佢，佢先可以成為一位偉大嘅球員。

加入祖雲達斯後，作為C朗嘅新隊友，好似杜格拉斯哥斯達就曾經表示，C朗嘅訓練連佢都頂唔住，亦即係佢訓練強度已經遠超職業球員嘅水平，就係咁先造就到一幅銅皮鐵骨嘅身驅，亦都證明天才其實都需要努力的！