NBA長年以來最穩定嘅球隊馬刺，今年夏天可以話經歷隊史最大嘅地震，除左原來嘅球隊核心Kawhi Leonard與球隊鬧翻，繼而連同Danny Green被交易至速龍；Tony Parker為左爭取正選位置而決定轉投黃蜂；「鬼切」Manu Ginobili宣佈退役。唯一不變嘅係，馬刺嘅領隊依然係個一位 - 「軍神」普波域治(Gregg Popovich)。

現年69歲嘅普波域治，自1996年起接管馬刺主教練一職，即將展開嘅新一季NBA賽事將係佢第23年執教馬刺，而期間佢憑住「三頭馬車」GDP：Tim Duncan、Manu Ginobili及Tony Parker，成功5次取得NBA總冠軍。

能夠喺NBA長期執教同一支球隊，同時交出非常好嘅成績，普波域治絕對係罕見嘅存在，而其中佢令人佩服嘅，除左能夠為馬刺打造一套獨有嘅球隊文化之外，就係佢本人嘅籃球戰術多不勝數，堪稱NBA嘅「軍神」。

究竟普波域治嘅戰術有幾多？近日一位NBA球探就直言，要想刺探下普波域治黎緊會用嘅戰術，你根本就係搵黎搞，因為基本上佢隨手就可以喺比賽期間從自己嘅戰術收藏入面拎一個出黎用。而如果要用一樣野黎形容普波域治嘅話，呢位球探就話佢根本就係亞歷山大圖書館，後者曾經係世界最大嘅圖書館，擁有無數嘅珍藏，側面說明普波域治內裡究竟有幾多戰術。

曾經，普波域治係比賽一開始出奇不意就對「巨無霸」O’neal施展「砍殺戰術」，又曾經好似施魔法咁令場上可以同時出現6位馬刺球員，總之佢就係有佢嘅方法去令馬刺與時並進，甚至可以話喺戰術上走在最前。

黎緊嘅新球季，馬刺陣容上有住顯著嘅大變，但係只要仲有普波域治在，佢地仍然係可以繼續比驚喜球迷，打出最合理嘅籃球。