《加菲貓》（Garfield）係一部美國漫畫，由James Robert "Jim" Davis創作，主角加菲係一隻橙色嘅貓，同伴包括一隻唔太聰明嘅寵物狗阿的（Odie），以及佢哋嘅主人阿北（Jon Arbuckle）。《加菲貓》嘅故事係以寵物主人同佢哋嘅寵物取材，並帶出「好多時候，寵物先係家裏嘅主宰」嘅信息。另外，加菲貓亦經常需要解決許多人類遇到嘅問題，例如減肥、對星期一嘅厭惡及恐懼、對事物嘅冷感及煩悶等。

作為一個虛擬角色嚟講，加菲貓可謂相當成功。加菲貓漫畫於1978年6月19日推出，1982年首次以電視動畫出現，到2004年更被搬上銀幕，到而家2018年，再有新消息指出，大家又可以喺電影銀幕上睇到《加菲貓》嘅動畫電影喇！

當年2004年嘅《加菲貓》電影，係以電腦動畫製作加菲貓，另外由真狗扮演阿的，其他角色如阿北亦以真人扮演。而最新嘅《加菲貓》動畫電影，就未有透露會以2D定3D呈現，不過根據外國媒體報導，呢次嘅動畫電影將由曾經擔任《小魚仙》、《阿拉丁》視覺特效、執導《四眼雞丁》動畫作品嘅Mark Dindal擔任導演，Paul Kaplan同埋Mark Torgove編寫劇本，《加菲貓》原作者James Robert "Jim" Davis擔任製作人，唔知大家又期唔期待呢？