《學園孤島》（日語：がっこうぐらし!）係海法紀光原作、千葉鞍作畫嘅日本漫畫作品，講述喺充滿喪屍嘅世界中，巡之丘學園高等學校嘅女高中生丈槍由紀、惠飛須澤胡桃、若狹悠里、直樹美紀等人，點樣拼命地喺被喪屍包圍嘅校園中求存，同時享受快樂嘅校園生活。而《學園孤島》有趣嘅地方，就係由紀會出現一種叫「退行」嘅自我防衛機制心理變化，喺佢眼中，世界一切如常，並冇任何改變，然而當視角切換成其他人時，就會發現佢嘅精神狀況並唔正常，仲會見到其他人見唔到嘅幻覺。

而《學園孤島》喺2015年嘅時候曾經推出過動畫版，到而家先再推出真人版電影，據講真人版會同動畫版一樣，依「由紀眼中嘅正常世界」同埋「其他人眼中嘅崩壞世界」兩種視角進行拍攝。

演員方面，丈槍由紀會由長月翠飾演，惠飛須澤胡桃由阿部菜菜實飾演，若狹悠里由間島和奏飾演，直樹美紀由清原梨央飾演，佐倉慈由小野乃乃香飾演。至於導演則由柴田一成擔當。