尋晚歐聯戰火再開，其中「紅魔鬼」曼聯主場迎戰年青人，雙方激戰90分鐘驚險場面唔少，但就係缺少左入球。不過，就喺進入最後補時階段，費蘭尼一記神來之筆轉身一射，就將勝利帶左比曼聯！而入波一刻，領隊摩連奴更非常激動，隨手拎起一籃球員飲品就丟向地面，真係熱血值爆錶！

今場曼聯雖然全面搶得主動權，控球率達6成，全場亦高達17次射門，但係命中卻只有4次，更要戰至補時階段先取得入球。不過幸運女神今日降臨曼聯身上，令已經無左爆炸頭嘅費蘭尼成功救主，助球隊全取三分。

拎到呢3分之後，曼聯成功攜同祖雲達斯提前一輪晉身16強，而最後一場小組賽兩支球隊需要為小組首名而戰，其中曼聯將會對上華倫西亞，而祖記則對上年青人。

除左獻上絕殺球嘅費蘭尼之外，仲有另外一人今場非常搶鏡，講緊嘅就係曼聯領隊摩連奴。當佢見證球隊絕殺年青人一刻，佢竟然激動得拎起一籃飲品怒丟向地，飲品四淺盡顯激情，個種熱血真係爆瀉！

網上隨即已經有人畫左摩帥爆樽嘅whatsapp sticker，大家記得save低佢啦！