要數2018年桌球界表現最出色嘅球手，相信必定係奪得世錦賽冠軍兼赤裸上身見傳媒，現時世界排名第2嘅Mark Williams。不過計上風頭及成績嘅話，「火箭」奧蘇利雲卻絕對係2018年桌球嘅第一風頭人物。

「火箭」上季個人奪得5個排名賽冠軍，而今季至今已經奪得3個冠軍，其中包括英錦賽冠軍，令佢生涯嘅排名賽冠軍增加至34個，距離打破「桌球皇帝」亨特利嘅只差2個冠軍。

如今43歲嘅奧蘇利雲，喺呢個年紀仍然有咁出色嘅表現實在令人震驚，因為好似當年亨特利就係喺43歲退役的。而更甚嘅係，奧蘇利雲日前接受訪問時表示，自己希望可以打到60歲，呢個你當然可以當成係佢講笑，但係世事無絕對，更何況呢位可能係桌球史上最出色嘅球手。

6屆世錦賽冠軍嘅Steve Davis，職業生涯打到58歲，但事實上佢1997-98球季後已經走下坡，其後嘅比賽生涯都係似玩樂居多，所以同如今仍然可以奪得多項賽事冠軍嘅「火箭」難以相提並論。

一位坐擁無數紀錄嘅球手：70個冠軍(34個排名賽冠軍)、15次打出147、986次Century breaks、歷史最快完成147(5分20秒)....等等。而喺佢身前，超越亨特利36個排名賽冠軍嘅紀錄亦指日可待。

明顯，如今嘅奧蘇利雲已經成熟得令人可怕，其中最主要嘅係佢嘅心態已經完全唔同，佢視比賽勝敗如浮雲，比賽毫無緊張可言，佢只係想享受比賽帶比佢嘅滿足感。所以，奧蘇利雲而家每一次出桿都更輕鬆，更能發揮自己最出色嘅狀態，即使佢唔處於自己嘅最佳狀態，佢仍然憑住天賦擊敗眼前每個對手。

試問一位咁樣嘅球手話比你聽佢想打到60歲，作為對手嘅你能夠唔倒抽一口涼氣嗎？