討論NBA的GOAT (歷史最佳) ，相信唔會有完結嘅一日，因為每個人心目中都有自己嘅GOAT。不過，日前「大帝」LeBron James接受媒體訪問時卻表示，喺2016年帶領騎士逆轉擊敗勇士奪得總冠軍後，佢當刻自覺成為NBA歷史最佳球員！

對於LeBron自認為歷史最佳嘅言論，隨即有唔少人作出批評，其中包括「籃球之神」Michael Jordan！

Jordan相信有可能係最多人心目中嘅GOAT，不過呢位曾6奪總冠軍嘅「籃球之神」卻唔敢認自己係GOAT。Jordan表示：「我並唔覺得自己係GOAT，因為咁樣係對Wilt Chamberlain、 Jerry West等前輩嘅不尊重。每次有人話我係GOAT嘅時候我都會覺得尷尬，因為我從來無機會與佢地交手，所以無辦法得知邊個更加偉大。如果外界話我係GOAT，我會接受，因為呢個係佢嘅諗法，但係我自己就唔會稱自己為GOAT。」

從Jordan嘅說話中可以睇到，呢位「籃球之神」係幾咁謙虛，佢唔會妄自尊大，目中無人，反而非常尊重前輩，咁樣嘅態度實在令人非常佩服及尊敬。

而LeBron說出看似唔尊重前輩嘅說法，但當你代入當刻嘅LeBron，成功帶領自己嘅母隊首奪NBA總冠軍，擊敗嘅仲要係常規賽73勝嘅勇士，兼且仲要歷史首次總決賽落後1:3嘅情況下逆轉奪冠，試問LeBron又點會唔興奮到失控呢？