《後街女孩》（Back Street Girls）係Jasmine Gyuh創作嘅一部日本漫畫，講述黑道3人組因為犯錯而又唔想被老大殺害，於是被迫接受變性手術同全身整型手術，搖身一變成為地下偶像「後街女孩」，仲紅極一時有好多粉絲！不過佢哋嘅內心依然係雄糾糾嘅黑社會男兒，對於變成少女每日要扮可愛生存，都感到極度苦惱……由於呢套漫畫非常爆笑，所以有唔少讀者捧場，喺2018年7月3號時仲正式開播改編動畫，風頭一時無兩，雖然《後街女孩》嘅動畫經已播映完畢，不過熱潮未退，官方之前仲宣佈會出埋《後街女孩》嘅真人版電影，但估唔到電影版都仲未開播，又傳出《後街女孩》決定真人版日劇化嘅消息！聽講日劇版仲會比電影版更接近原著，更癲更好笑！

暫時官方透露嘅消息係︰日劇版將會有六話，陣容同電影版完全相同，黑道流氓分別由白洲迅、柾木玲彌、花沢將人出演，而美少女偶像則由岡本夏美、松田るか、坂ノ上茜出演。重點係，官方強調，日劇版會比電影版更大力還原原作劇情，並於2月17日極速開播，真係好令人驚喜！