好多人由細到大都唔鍾意參加考試，但如果係《HUNTER x HUNTER》故事中嘅考試，巴打們又會唔會蠢蠢欲動想試一試呢？日本知名解謎活動製作公司「SCRAP」最近就同《HUNTER x HUNTER》合作，推出「HUNTER x HUNTER 密室逃脫」而且仲係以獵人考試嘅模式展開，聽落都相當興奮！

呢個「HUNTER x HUNTER 密室逃脫」體驗可以畀你一個人毒住咁玩又得，同朋友一齊參加又得，最多可以搵四個人一齊組隊。玩法方面，其實同原作都好接近，首先要等到主考官到現場先會發表考試內容，而參加考試嘅準獵人只要喺限時60分鐘內達成所有任務，就可以通關成功並且獲得獵人執照！

「HUNTER x HUNTER 密室逃脫」將會喺東京、名古屋、大阪、福岡同札幌日本全國五大城市舉辦，目前公開嘅場所係東京站！東京站將會於3月9日開跑，一路舉辦到6月，想參加嘅人必須購票參加，而且票價分為預售優惠票、附特典贈品預售票以及當日票價，有興趣去玩嘅朋友最好早少少於官網購票，不過相信到時成個遊戲過程都會用日文玩，唔識日文嘅巴打睇怕想玩都幾難……