一提起井上雄彥，相信大家第一時間諗起嘅一定係《男兒當入樽》呢套神級漫畫，一幕幕主角櫻木花道嘅搞笑及熱血片段、三井嘅名句、流川嘅瀟灑等一定記憶猶新。《男兒當入樽》至今已經完結超過20年，大家唔想但都要接受唔會有續集，但井上老師卻好似有意無意要大家唔好忘記，其中包括近日宣佈「井上雄彥 x B聯賽 x 日本天馬航空」嘅合作！

如果大家有留意，井上老師自從2016年起就與全新成立嘅日本職業籃球聯賽B聯賽合作，佢會定期與球員對談並為球員繪製插畫，當然畫出黎嘅非常有《男兒當入樽》嘅味道。

而最新一輪嘅合作，更加將井上老師嘅畫作與日本天馬航空聯乘，推出一部名叫「B.LEAGUE JET」嘅飛機，機身上將印上井上老師嘅作品，而飛行期間亦會有限定商品在機上出售，絕對會令一眾《男兒當入樽》迷難以抗拒。

當然，今次合作主要目的都是希望可以推廣B聯賽，透過井上老師嘅人氣，相信會令更多球迷有所認識。