全場比賽精華

歐聯16強次回合，皇馬回到主場迎戰阿積士，本身拎住2:1領先優勢嘅佢地，自以為好大機會可以晉級，誰不知卻遇上黑馬，最終竟然喺主場被對方血洗，以1:4不敵對手出局收場。

今場皇馬落敗嘅其中一個主因，係後防明顯防不住阿積士，其中因為首回合疑似洗牌嘅沙治奧拉莫斯被禁賽，令球隊只能夠派上拿祖出任正選中堅，而拉莫斯則只能作壁上觀，並為球隊嘅落後在場邊焦急，但呢一切只能夠講係佢自己及球隊輕敵攞黎。

在沒有拉莫斯嘅情況下，皇馬早早在18分鐘已經落後兩球，在下半場62分鐘再多失一球，令皇馬兩回合計暫以2:4落後，而幾分鐘後阿辛斯奧扳回一球，令皇馬尚有一絲有望，只要攻入兩球佢地就可以晉級。不過好可惜，舒奧尼在72分鐘福至心靈嘅罰球直接將皇馬判處死刑。

最終，皇馬主場竟以1:4落敗，兩回合計則以3:5不敵對手，止步16強。而皇馬16強出局，亦令佢地數個紀錄終結，其中包括連續8連殺入歐冠盃4強，還有連續3年殺入歐冠盃決賽。同時，歐冠盃出局亦基本上宣佈皇馬今季將會四大皆空，因為佢地國王盃已經出局，西甲聯賽又落後巴塞多達12分。