今年香港有兩支足球隊成功殺入亞協盃，佢地分別係本地班霸傑志以及出身自地區球隊嘅和富大埔。兩支目前排喺港超聯頭兩位嘅球隊，最終竟然意外喺亞協盃分在同一組，真係可以話冤家路窄。更有趣嘅係，兩支球隊亞協盃嘅第一戰，就係雙方嘅對壘。

亞協盃嘅第一戰，傑志叫做喺旺角場「主場」迎戰大埔，有2千多名球迷入場欣賞比賽，而由於今場係達到亞洲賽事級別，所以現場分有主隊及客隊嘅球迷區，對於本港嘅球迷黎講相信有一定嘅新鮮感。

而開賽擁有「主場」之利嘅傑志率先壓住大埔黎攻，但大約過左15分鐘後大埔開始企穩陣腳，並喺30分鐘由利馬喺中圈前少少嘅位置施放超遠射，球喺傑志門將王振鵬門前彈地導致佢判斷失誤，球喺手下漏入網。

換邊後，大埔再憑伊高沙托尼嘅射門改變方向領先至2:0。及後，傑志如夢初醒，先後由費蘭度及丹尼喺比賽法定時間餘下4分鐘前追成2:2平手。不過，大埔以極速憑住後備入替嘅鍾偉強及哈利再入兩球，最終鎖定4:2擊敗傑志。

斬獲首勝嘅大埔，下一仗將會主場面對台灣球隊航源，而傑志則要作客北韓球隊4.25體育團，作為香港球迷一定要繼續支持香港嘅球隊！