唔好一見到「魔法少女」四隻字就覺得《魔法少女小圓》呢套動畫係傳統女性向作品，同MenClub九唔搭八。心水清嘅巴打都知道，《魔法少女小圓》真係得個名「少女」，實情絕對唔簡單，動畫裡面出現嘅肢體破碎、集體自殺、滅門、精神崩潰同埋互相殘殺嘅露骨描寫，單單睇個動畫名真係完全估唔到會有咁嘅內容！

而且佢首播期間已經迅速得到廣泛迴響，仲引起日本社會現象，之後更係海內外摘取電視動畫史上最多嘅獎項，唔少人睇完《魔法少女小圓》之後都認為佢同《機動戰士高達》、《新世紀福音戰士》並列，係一部「每隔15、16年一現嘅劃時代原創動畫」，可謂相當巴閉！

而呢套由日本動畫公司SHAFT製作，新房昭之執導，2011年1月起開始喺MBS電視台播放嘅日本深夜動畫，久違八年，終於再有新消息傳出！根據動畫製作公司SHAFT總經理久保田光俊透露，《魔法少女小圓》將會推出續篇，佢表示︰「而家仲為咗製作續篇進行準備，敬請期待！」真係好想快啲有得睇呀！