雖然由劇集初開時大家都估到佢有啲嘢，最後一季有情人終成眷屬(就算得一晚)亦相當合理，但實際上見到時始終相當震驚，一來第二集主要用插叙法交代Winterfell眾人大戰最後一晚嘅情形，Arya撲上Gendry身上之前可謂毫無徵兆，殺咗我一個措手不及；二來觀眾們可以話係睇住Arya大，自然當佢係小妹妹，而見到一個小妹妹主動撲上個男人身上的確係一種幾奇怪嘅感覺！

根據外國雜誌《Entertainment Weekly》報導，最先發現呢場戲嘅其實係飾演Arya家姐Sansa，現實中與Maisie都係好朋友嘅Sophie Turner。當日佢同Maisie基本上係同時間收到《GOT》最後一季嘅劇本，但由於Sophie睇得快，所以當Maisie仲喺第一集中段時，佢就已經發現咗呢場戲，仲即刻打比Maisie叫佢睇咗呢場戲先。Maisie睇完仲以為呢場只係劇組為咗防劇透嘅「煙幕」，但後來先知劇組今次根本就冇安排任何假劇本，「Oh f__k！」就係佢嘅第一反應。

《GOT》一向以香艷嘅場面真係好香艷而聞名，所以知道要拍床戲之後嘅首要問題就係「Maisie係咪要/會露點上陣」？Maisie就話編劇David Benioff同Daniel Brett Weiss相當尊重佢嘅意願，露幾多(或幾少)完全由佢自己決定。但佢認為呢段戲嘅重點唔係Arya露幾多，而且劇中又有好多人露過，所以就揀咗個相對「保守」嘅拍法。

Maisie亦認為呢場戲對Arya這角色相當重要，「這對Arya來說是相當有人性的關係，是一種我們從未看過她有的情緒。」事實上由第二季開始，Arya一直面對住生存、訓練、復仇等嚴肅嘅問題，面對死亡佢亦無所畏懼，但當與White Walker的大戰一觸即發，全部人都真係過唔到聽日之際，佢對Gendry親口講出「我想試試」，顯示佢已經唔只係以前冷血無情嘅復仇者。