「泥地王」拿度較早前喺法網四強再一次遇上「瑞士天王」費達拿，最終拿度喺不失一盤下3:0掃走費天王，生涯第12次打入法網決賽。而喺決賽，拿度嘅對手係世界排名第4嘅添姆(Dominic Thiem)，最終「泥地王」依然以壓倒性嘅實力擊敗對手，第12次捧起法網嘅冠軍！

現年33歲嘅拿度，一直喺泥地賽事嘅絕對王者，因此喺法網可以話係神一般嘅存在，即使強如費達拿或祖高域亦都好難喺泥地賽擊敗拿度。喺今屆法網四強，拿度就再一次遇上費達拿，但賽事卻以拿度直落三盤獲勝作結。

而決賽面對添姆，拿度第一盤就以6:3先拔頭籌。第二盤，添姆成功搶得主動權，最終以7:5贏得呢一盤，要知道今屆賽事拿度只曾喺32強輸過比哥芬一盤，所以添姆都算非常利害。可惜之後添姆無以為繼，被拿度連續兩盤6:1，總盤數3:1擊敗添姆，順利奪得冠軍。

由2005年首次參加法網已經奪得冠軍，到今年已經係拿度第15次參加法網，期間佢一共贏得12次冠軍，當中包括1次4連冠以及1次5連冠，而目前則係三連冠，以佢喺泥地賽壓倒性嘅統治力，拿度未來絕對有望再奪冠。

唔知以拿度喺法網嘅成就，未來當佢退役之後，法網會唔會改名叫做「拿度泥地公開賽」呢？