C朗拿度作為目前世界最出色嘅球員之一，除左擁有無人能及嘅超強把握力，其身體質素亦都屬於世界級，但呢位5屆金球獎得主並無滿足於現狀，近日更搵黎前歐洲百米飛人黎幫佢進行訓練，以提升其爆發力，真係活到老學到老嘅典範！

現年34歲嘅C朗，雖然年紀上貌似已經步入球員嘅黃昏期，但係其真實表現卻並無因此而下滑，身體狀態(無論速度、跳躍、力量)亦都唔似有下跌嘅問題，究竟係咩原因可以令佢保持住咁好嘅身體質素？答案相信就係堅持訓練及精益求精。

日前祖雲達斯都未開始季前集訓，但係C朗已經率先開始進行個人訓練，佢搵黎前歐洲百米飛人Francis Obikwelu黎做自己嘅教練，從而提升起跑、爆發力等跑步嘅技術。對於呢位Obikwelu可能你唔算太熟悉，佢係2004年雅典奧運100米嘅銀牌得主，當時佢跑出嘅時間為9.86秒(歐洲100米紀錄)，僅以0.01秒輸比美國短跑傳奇加特連(Justin Gatlin)。

對於如今嘅C朗Obikwelu讚不絕口，佢覺得C朗其實非常聰明，相信佢可以一直保持出色嘅身體質素至40歲，而其中一個主因係C朗對科學訓練非常好奇，佢願意親身上陣嘗試新嘅訓練模式，從中獲得大量優勢。

一位基本上喺球壇上已經擁有一切，能力亦Keep得非常好嘅球員，仍然唔放棄進步嘅機會，實在係非常值得我地學習的。