前曼聯法國傳奇左閘艾夫拿日前宣佈，正式掛靴結束長達20年嘅球員生涯。

現年38歲嘅艾夫拿宣佈結束20年嘅球員生涯，呢位傳奇左閘生涯期間曾效力多間球會，其中包括：尼斯、摩納哥、曼聯、祖雲達斯、馬賽、韋斯咸及法國國家隊。

對於自己掛靴嘅決定，艾夫拿表示：「公平啲講，呢個係一個很容易落嘅決定，我對自己取得嘅成就每一天都非常感恩。」

「雖然我而家有點激動，但我覺得呢個係一個適合嘅時間點去宣佈呢件事。我憑住直覺去決定，我覺得係時候停落黎。」

雖然唔再繼續球員生涯，但係艾夫拿並唔會放棄以足球為事業，佢未來將會以擔任教練為目標，而佢2013年開始已經開始攻讀緊FIFA B級教練課程，而未來則會以考取A級教練牌照作為目標。

艾夫拿對於想成為教練，相信係因為受到前曼聯領隊費格遜影響，因為後者曾表示當年嘅曼聯陣中會出兩位出色嘅教練，而艾夫拿就係其中一位，另一位則係已經成為威爾斯領隊嘅傑斯。

艾夫拿效力曼聯8個球季期間，一共贏得5次英超冠軍、1次歐聯冠軍、3次聯賽盃冠軍及1次世冠盃冠軍，而喺祖雲達斯期間則贏得兩次意甲冠軍、兩次意大利盃冠軍。