面對武漢肺炎疫情，世界各國都有唔同嘅措施，相應地亦有不同嘅字眼去描述呢種措施，例如美國就強調「Social Distancing (社交距離)」，我哋就口罩洗手Work From Home，而日本就叫「外出自肅」，簡單啲黎講就係自我監管冇咩必要唔好出街，但「外出自肅」卻帶來一個出乎意料但好合理嘅結果——高中生懷孕數字急升。

位於日本熊本市嘅婦科、兒科醫院「慈惠醫院」設有24小時懷孕諮詢熱線，即係你發現自己有咗就可以打去問下資料咁，但醫院指自3月首相安倍晉三宣佈關閉學校之後，打電話去懷孕諮詢熱線嘅中學生數字就開始上升，四月時更創下醫院自2007年開業以來最多人數紀錄，佔整體查詢人數嘅13%，係平時嘅兩倍。

值得一提嘅係打去諮詢熱線嘅唔一定真係有咗，有人打去只係問「第一次做愛有冇機會懷孕」、「做完愛後女朋友早上唔舒服係咪有咗」呢類性知識，但當中亦有一部份係已經確認「中招」。

相關新聞發佈後，「中學生懷孕諮詢史上最多」成為日本網上熱搜詞，亦有唔少網友諷刺中學雞們理解錯咗「外出自肅」四隻字，以為唔畀外出就唯有中…咁話！呢單新聞亦令我諗起黃子華於《色情家庭》中話「讀書就係青少年嘅鴉片」，麻痺啲青少年等佢哋冇時間諗做愛，依家咁睇又真係幾準喎。