曾幾何時，位於圓方嘅戲院因為又大又新兼會上映較冷門電影，成為戲迷的心水之選 (亦幾何時亦因為地點較偏而成為偷情之選，Anyway)，而自上年3月由Broadway接手經營後，經過一整年分批整修，最近終於以完整新面貌重開，咁整完又有咩唔同，有咩吸引呢？

整修後的Premiere Elements維持12個影廳，全部換哂4K激光投影技術，其中最近門口嘅1、6號院為「CGS Laser巨幕」，簡單啲講，即係個銀幕特別大啦。其中6號院「CGS Laser」裝有兩部4K激光投影機，比起一般4K Laser更高亮度，配上Dolby Atmos聲效，非常適合用黎睇3D電影；而1號院「CGS THX」雖然只有一部投影機，但就喺Atmos之上再配上最早由Lucas Film定出嘅「THX」規格，聲音還原度更高。順帶一提7號院亦配上Atmos聲效，5號院就係只有23個按摩椅式座位嘅VIP院，大家揀戲院時要留意啦。

除咗視聽享受之外，新戲院喺飲食方面都有花心思。除咗一般小賣部會有嘅爆谷汽水、熱狗燒賣之外，仲有單骨雞翼、芝士魚餅、燒墨魚丸等特色小食，更有戲院旁邊的Chiba Restaurant提供芝士薯條、炸蕃薯條、炸雞脾、澳洲和牛芝士漢堡、窩夫、甚至Pizza等「正餐」，價錢合理之餘仲可以帶入場慢慢食，令睇戲成為視、聽、味三覺享受。但要提提大家嘅係目前受疫情影響，戲院場內嚴禁飲食，大家要睇住黎食就要等多陣。另外Chiba亦提供堂食Menu，多咗啲意粉、海鮮拼盤之類嘅菜色，食埋先入場又得。

另外戲院大堂與前身變化甚大，除咗票房搬咗去較入位置，整體空間感亦大咗唔少。戲院亦增設多部售票機及取票機提供自助服務，小賣部亦引入有如快餐店嘅點餐機，減少等候時間。