今年康城影展原定於5月中旬舉行，但因為武肺影響先延期後取消，但會方依然決定公佈56部片單，一方面表揚電影創作者及作品，一方面亦為協助推動戲院陸續重開後嘅票房，換言之你可以理解呢份名單係影展方推薦你去睇嘅電影。而56部之中除咗香港嘅《七人樂隊 (前名：八部半)》，最啱香港觀眾口味嘅仲有韓國延尚昊導演嘅《屍殺半島》。

相信經過咁多年嘅教訓，大家對於「電影續集」應該充滿戒心，而且前作越好睇，你個心就越戒。所以或者你都同我一樣，都係用觀望態度去睇以《屍殺列車》續集為賣點、但個預告氣氛同風格都同前作相差頗大嘅《屍殺半島》。但依家康城都推薦喎，咁就似乎有啲信心啦！本片亦係延尚昊導演第二部入圍康城嘅作品，第一部你估下係咩？係啦，咪就係《屍殺列車》囉。

至於本土出品嘅《七人樂隊》，原名為《八部半》，早於2015年就公佈會拍，並原定由堪稱「香港導演界Avengers」嘅洪金寶、袁和平、徐克、吳宇森、許鞍華、林嶺東、譚家明及杜琪峯八位共同執導，最後亦成為林嶺東導演嘅遺作。電影會由上世紀40年代開始，每位導演選取一個年代，拍出以香港為背景嘅八個單元故事，但後來吳宇森亦以健康理由退出，就成為依家嘅《七人樂隊》。

另外片單中仲有人稱「魏置中」嘅Wes Anderson新作《The French Dispatch》、Pixar嘅動畫電影《Soul》、Steve McQueen執導嘅《Mangrove》及《Lovers Rock》。亞洲電影方面亦有河瀨直美嘅《朝が来る》、深田晃司嘅《本気のしるし》、韓國林常樹導演嘅《헤븐: 행복의 나라로 (直譯：天堂：走向幸福的國家》、台灣導演魏書鈞嘅《野馬分鬃》、以及宮崎駿老師個仔，宮崎吾朗執導、吉卜力首部3D電腦動晝出片嘅《アーヤと魔女》等。