講起「富奸」，可以話所有動漫迷都對佢又恨又愛，恨就好明顯係佢「《鬼滅之刃》開始連載，古拿比加啱啱上船，《鬼滅之刃》完結，古拿比加仲喺船上面」嘅停更能力，以及《幽☆遊☆白書》話完就完嘅經典結尾；愛啦喎，咁佢啲作品又真係好睇嘛！好睇到就算完結超過25年，如果《幽☆遊☆白書》搞展覽，你都會想去架係咪？

圖片：幽遊白書特展 on Facebook

《幽☆遊☆白書》25週年時曾經喺日本東京搞過一個小型展覽，但講到真正嘅「特展」，就要數到黎緊7月20日，於台灣台北華山 1914文創園區舉行嘅「幽☆遊☆白書特展」，亦會係《幽》全球首個特展。屆時將會展出近150幅 人物場景設定稿，以及大型戶愚呂(弟)雕像，據報亦會重現「暗黑武術大會」等四大篇章場境，入場仲送《幽》萬變卡！首2000名買飛嘅觀眾仲有特別禮品！

講就講到好似好吸引，但身在香港嘅大家都知道，最大嘅問題係呢個時勢根本就去唔到旅行，有錢有時間都去唔到，不幸中嘅大幸係特展由7月20日放到9月20日，理論上仲有三個月時間，希望到時武肺疫情完結啦！