由Daisy Ridley主演嘅《Star Wars》續集三部曲，雖然算係為《Star Wars》正傳畫上句號，但對星戰迷黎講，續集三部曲就真係算唔上叫好睇，特別係Daisy Ridley飾演嘅主角Rey嘅身份，由第一集大家估係咪Skywalker家成員或者Obi-Wan嘅後人，到第二集話佢係普通人，到第三集突然又係白卜庭嘅孫女，變黎變去好似根本冇諗好咁——原來又真係冇諗好喎。

卻說Daisy Ridley早前接受Jimmy Kimmel Live嘅代班主持，兼佢好友Josh Gad嘅訪問，當中就提到Rey於續集三部曲中似乎變黎變去嘅身份，而Daisy亦承認「一開始的確有討論過Rey與Obi-Wan的關係，之後有很多個版本，然後看起來Rey就是個普通人。到第三集時J.J. Abrams跟我說『噢對，白卜庭是你爺爺』，我說『很好』，但過兩個星期他看起來又不是那麼肯定。」佢甚至直言「就算去到拍攝途中，我都不知道答案會是甚麼。」

呢段訪問嘅Youtube版下有網民留言，指Daisy呢番說話再次確認Disney同Lucasfilm根本對續集三部曲嘅故事毫無計劃，連主角嘅身份都係一路拍一路諗。有人亦提出當初Disney見《Force Awaken (第七集)》反應唔好，於是《Last Jedi (第八集)》換上Rian Johnson做導演，結果反應更加唔好，然後又搵返J.J. Abrams黎拍 《The Rise of Skywalker (第九集)》，結果就令角色發展左搖右擺。