講到日系RPG，《勇者鬥惡龍》(Dragon Quest)同《最終幻想》(FINAL FANTASY)系列可以話係佼佼者，兩者從80年代鬥到依家，從紅白機鬥到去PS4。最近日媒ねとらぼ進行問卷調查，問人最愛RPG係FF定DQ二選一。

調查從2020年12月12開始，直到2021年1月1日結束，總共收到9461票。結果顯示FF只有3703票（39%），而DQ就有5754票（61%）取得壓倒性勝利。從評論部份發現，大家都覺得FF系列係遊戲畫面上做得好有「電影感」，CG技術靚到人震驚。但係佢哋更鐘意由漫畫家鳥山明做美術指導嘅DQ系列，比起劇情深邃嘅FF，DQ歡樂有趣氣氛更吸引。

結果有無令你意外？對於香港人嚟講可能FF系列會較多人熟悉，咁如果到你哋二選一你又會投邊個先？唔洗問我啦，我就兩個都唔投，講到日系RPG系列我只信火焰之紋章系列。