Michael Jackson被譽為「King of Pop」，其著名舞步如Moon Walk等至今仍係膾炙人口。而Pure Arts最新就推出「Michael Jackson Smooth Criminal」1/3全身雕像。

「Michael Jackson Smooth Criminal」1/3全身雕像全高60cm，以MJ於1988年推出嘅《Smooth Criminal》MV為藍本，重以真實布料重現MJ身上嘅白底黑幼直間西裝，就連西裝內袋、袖口鈕等精細部份亦一應俱全。而MJ嘅長髮係用植髮工藝製作，即使紳士帽遮住大半塊面，但依然有加上眼睫毛。

動作方面就選擇咗當時驚為天人嘅45度傾斜舞步，而為咗支撐重量，雕像內部亦用上鋼架結構。特別值得一提嘅係，現實中MJ之所以能夠做到呢個違反人體力學嘅動作，係靠鞋底嘅特別結構扣住舞台地板嘅特別裝置，而雕像雖然就唔係用呢個方法固定，但亦有重現鞋底結構。

雕像有分為普通版及高級版，分別在於高級版多咗個MV中亦有出現嘅點唱機，具LED發光功能，仲有個隱藏空間可以放藍芽喇叭。普通版US$899、高級版US$1,399。