男女出街應唔應該由男人畀哂錢，一直以黎都係兩性關係之中嘅重要問題，有人會話男人要照顧女仔就緊係一蚊都唔使佢出，亦有人話畀錢唔係問題，條女大安旨意嘅態度先係問題。日本就有網站做咗調查，發現男女嘅約會花費的確有非常有嘅差異。

《Leading-Tech》訪問咗超過1,200名日本18歲以上男女，問到佢哋與異性約會時嘅花費，結果發現男性平均每次約會要使6,805Yen，即係大約HK$503，當中大部份人會用5,000至6,000Yen (35.7%)、其次就係用10,000至11,000Yen嘅組別 (22%)，更有7.1%人係用超過15,000Yen，即係約HK1,100z

而女性嘅平均約會使費就只有2,612Yen，即約HK$193，其中有25.7%女性係出少於1,000Yen，即係少過HK$74左右，而每次約會用多過6,000Yen (約HK$450) 嘅女性只佔5%。

圖片：《Leading-Tech》

不過咁唔代表日本男仔好唔滿意喎，事關係無論係10代或者50代，所有年齡層都有超過70%男性受訪者認為，約會嘅使費應該由男生全數支付，或者至少係男仔佔大份，認為應該男女AA嘅人只佔25%左右，認為應該由女性畀多啲或者畀哂嘅更加係屈指可數。

反而日本女性們就比想像中更願意出錢，其中10代女性有超過一半都願意AA，20代及30代亦有近4成人願意AA。不過值得一提嘅係，隨住女性年齡上升，認為應該由男方全數出錢嘅比例亦直線上升，去到50代女性更有超過4成認為男方應該出哂錢。

圖片：《Leading-Tech》

咁呢個調查有咩寓意？首先，如果你係希望搵一個願意AA制嘅女朋友，咁你就應該去日本搵個十幾歲嘅女朋友，因為佢哋係最有機會願意同你AA嘅；而如果你對AA制冇咩要求，你都應該要去日本搵女朋友，因為平均約會費用都係500蚊咋，喺香港食餐飯都未必得啦！

資料來源：《Leading-Tech》