近期新興語音社交平台Clubhouse愈嚟愈多人玩，唔少人更會喺App上討論敏感話題。不過最近美國史丹福互聯網監察機構（Stanford Internet Observatory, SIO)指出Clubhouse存在安全隱患，其背後所採用嘅技術同中國公司Agora有關，令中國政府有機會取得用戶資料。

SIO研究員發現，Clubhouse聊天室數據會被傳送到一個由中國託管嘅伺服器上，而聲音數據則傳到一個中國實體管理嘅伺服器，再轉傳到其他伺服器。加上Clubhouse用戶及聊天室嘅ID號碼只以純文本方式傳送，導致Agora只要透過監察網絡流量，再對返聊天室用戶ID，就有機會知道使用者身份。簡單嚟講，即係大家嘅資料無用到勁嘅加密方式同埋會傳送到中國伺服器。

消息曝光後，Clubhouse發聲明表示，公司將會喺72小時之內進一步加強數據保護，推出新更新填補漏洞，以防止用戶資料傳送到中國伺服器，並會額外聘請資安公司做審查及評估更新措施有效性。