著名德國音訊裝置品牌Sennheiser，擁有超過70年歷史，有玩開音響嘅朋友絕對唔會陌生。近日Sennheiser宣布，正搵緊合作夥伴投資、甚至收購其消費型產品業務，該業務包括耳機同Soundbar。並打算往後專注發展專業音訊領域、Neumann麥克風及商業通訊，例如錄音室、音樂廳、禮堂及會議室所用到嘅音訊技術。

據了解，Sennheiser為咗可以集中資源發展專業領域，正搵緊合作夥伴投資或收購消費型產品部門，並認為現時消費型產品線旗下嘅耳機及Soundbar有相當大潛力，有信心可以喺激烈競爭嘅市場下脫穎而出，但需要一個強大嘅合作夥伴投資。Sennheiser更持開放態度，表示唔介意出售整個消費型產品業務，最重要係令所有業務領域可以從調整中變得更強大。

Sennheiser Momentum True Wireless一代。（圖片來源：Sennheiser ）

Sennheiser兄弟接受德國媒體handelsblatt訪問表示，真無線耳機已經非常流行，坦言公司太遲加入真無線耳機市場，儘管喺2019年創下唔錯銷售額，但扣除各項開支後反而蝕錢。其實從Apple帶起真無線耳機熱潮後，好多傳統耳機廠商認為只要做好有線耳機，一樣可以夠維收益。奈何真無線耳機價格已經同入門有線耳機差不多，即使同價位真無線耳機音質比唔上有線耳機，大部份用家為求方便都轉用真無線耳機。到好後期Sennheiser先加入真無線耳機戰場，推出Sennheiser Momentum True Wireless一代，卻因斷線及電量問題而被比下去，就算二代已經改善咗唔少問題，仍然難以同其他牌子同場較勁。

資料來源：The Verge、sennheiser