繼上次出完「充氣背心」系列後，全球知名品牌Louis Vuitton又有新搞作。最近有件新衫上市，將14隻公仔掛喺件長袖冷衫上面，包你行入幼稚園嗰陣會威過威士忌。

件衫上面掛有14隻色彩繽紛嘅編織公仔，包括有青蛙、老鼠、熊貓、紅鶴、蝎子等等，差唔多將半個動物園放咗上身。冷衫以柔軟嘅美利奴羊毛編織，100%羊毛製造無添加人造纖維，著上舒服又唔怕會皮膚敏感，而且所有公仔都喺Made in Italy。怕著住出街會被人當成怪叔叔？唔使驚，心口隻紅色公仔有條印有LV LOGO嘅頸巾仔，咁就唔怕人地唔知件衫係LV出！

據官網資料，呢件衫售價為$63,500港幣，並採用定製形式售，你想即時買都買唔到。

其實LV唔係第一個諗到將公仔放上衫，早幾年法國設計師Jean-Charles de Castelbajac都有設計過類似嘅作品，佢仲玩得更放，將成件衫都變成teddy bear。