唔知日本近排係咪興鬥有「良心」，早兩日先講完有公司可以因為偶像結婚而請10日有薪假。最近又有一間日本公司因為《Monster Hunter Rise》即將推出，而宣布遊戲發售當日全公司放假，等大家可以去屠龍。

社員がこの日に休暇を取る人が多数いるのでまとめて休みにした。 pic.twitter.com/yF5VgEOD9t

— JackMasaki (@JackMasaki) March 23, 2021

呢間名為「Mark-on」嘅科技公司，主要從事開發VR、AR及MR系統。公司董事長檜山正樹，尋日就係Twitter宣布，由於26號（《Monster Hunter Rise》發售日）太多人請假，同時亦相信當日大家都無辦法專心工作，所以索性全體放假一日，並稱為「芒享假」，等大家可以去屠龍。截至目前為止個Post已經有超過16萬個like，唔少網友都表示羨慕，更有人提議不如全公司一齊喺Office打機仲有趣。

《Monster Hunter Rise》將於3月26日發售。

據日媒ねとらぼ報導，原來董事長檜山正樹本身都係一個「芒享」迷，從第一代已經開始玩，而且每部作品都至少玩500個鐘以上，咁大家應該知道點解佢會放假啦。想放遊戲假，首先就要令老闆都打機！

等咗10年，Portal仍然未出第三集。

小弟翻查資料，其實都唔係第一次有遊戲發售而出現請假潮。大約喺10年前（無錯，可能因為近10年都無Game正到要請假玩），Valve旗下射擊解謎遊戲《Portal 2（傳送門2）》推出嗰陣，就喺外國引發過一輪請假潮，除咗好多打工仔請假之外，更有大學教授宣佈當日停課，因為自己都要去打機。

資料來源：ねとらぼ