三月中嘅時候Nikon公佈無反旗艦機Z9正在開發中，預計2021年內推出；事隔一個月就輪到Canon反擊，日前公佈同樣係無反旗艦機嘅EOS R3亦處於開發當中。

圖片：Canon

齋睇個外型，EOS R3同Z9其實係有幾分相似，都係四四方方、睇落非常厚實、而且有齊橫直度手柄，整體佈局與Canon目前頂級DSLR EOS-1DX Mark III亦非常似樣，不過就明顯瘦咗一個碼。據公告所講，R3將係首部用上新35mm全片幅背光多層CMOS感應器嘅EOS相機，亦會配有DIGIC X影像處理器及電子快門，於對焦或曝光鎖定嘅情況下都拍到30fps連拍。另外亦有深層學習演算法，會識得自己去認人頭、人眼、甚至人身 (上半身)，以及視線對焦，即係部相機識得跟隨你嘅視線專換對焦點，協助用家更快更準確地拍照。

目前關於EOS R3嘅情報大概就係咁多。值得一提嘅係公告中冇講到任何推出時間。

資料來源：Canon