最新消息：英超六支球隊先後宣佈退出「歐超聯」，各位玩家唔使再擔心！

近日12支歐洲頂級球會宣布自組「歐洲超級聯賽 (European Super League)」消息震撼球壇，各位球迷除咗擔心心儀球員無得打國際賽同世界盃之外，機迷們都可能無得再喺《FIFA》用各隊勁旅。

European Super League球隊。

眾所周知，EA Sports出品嘅足球競爭遊戲《FIFA》系列係得到國際足協（FIFA）官方授權特許經營，能夠喺遊戲入面使用各國超級聯賽球員真實名字及肖像，玩家遍佈全球各地，絕對係當今最具人氣足球遊戲。

隨住「歐超聯」嘅出現，國際足協（FIFA）及歐洲足協（UEFA）都先後出聲明叫球隊唔好自立門戶，更威脅禁止「歐超聯」球員出戰其他歐洲賽事，以及代表國家隊出賽。現時三方仲嘈緊，預計最壞情況FIFA同UEFA將會杯葛所有「歐超聯」球隊，意味著各位機迷唔會再喺《FIFA》系列見到「歐超聯」所有球隊及球星。

而另一邊廂，由KONAMI出品嘅足球競爭遊戲《PES》系列，就唔似《FIFA》同國際足協（FIFA）捆綁埋一齊。因此，如果「歐超聯」被杯葛，好可能會同KONAMI達成協議，令各隊勁旅喺《PES 2022》再次登場。

PES遊戲截圖。

事實上，過往PES就曾經以假球隊及假球員名去解決版權問題，例如CHELSEA B就代表車路士、LIVERPOOL R就代表利物浦、MANCHESTER B就代表曼城。所以就算「歐超聯」退出《FIFA》系列，EA Sports確實可以用同樣方法彷製返12支隊球。

有位Reddit網友就已經整定張圖抽水。（圖片截自：Reddit）