動畫電影《風之谷》貴為宮崎駿吉卜力工作室第一部作品，一直以嚟都有唔少名導想翻拍真人版電影重現（破壞？）經典。近日吉卜力工作室製作人鈴木敏夫喺電視節目透露，《ALWAYS幸福的三丁目》導演山崎貴，以及《新世紀福音戰士》導演庵野秀明都有意翻拍真人版《風之谷》，至於係咪拍得成就要睇說唔說服到宮崎駿啦。

其實多年嚟都有傳聞指參與過《風之谷》製作嘅庵野秀明，一直希望以動畫形式「補完」當年《風之谷》電影未涵蓋嘅原作漫畫情節，不過今次就係第一次聽到佢話想拍真人版《風之谷》。

大家又唔使咁快就驚會出現《真．風之谷》，鈴木敏夫好巧妙咁解釋「個個都想拍一部真人版《風之谷》，但宮崎駿係唯一一個唔想拍嘅人。」間接表示只要宮崎駿唔批准，永遠都唔會有真人版《風之谷》出現。鈴木敏夫亦提到，宮崎駿曾多次拒絕荷里活片商翻拍真人版提議，認為翻拍只會令原著「改頭換面」。話雖如此，宮崎駿都曾經祝福過歌舞伎版《風之谷》演出，不過前提就係對方唔好要求宮崎駿會作出任何幫助。因此，鈴木敏夫推斷即使將來有真人版《風之谷》出現，宮崎駿都好大可能完全唔參與其中。