「第二次世界大戰」可能係影視歷史上用過最多次嘅主題，幾乎每場戰役都已經被人拎過黎拍戲拍劇，當中更有好多部難以超越嘅經典名作。所以當你睇到《波斯密語》又係講二戰猶太人，或者會心諗「又黎？」。但其實電影係用咗個獨特嘅角度，去探討二戰中嘅世界。

《波》嘅故事改編自德國作家「Wolfgang Kohlhaase」嘅短編小說《Erfindung einer Sprache》，直譯為「語言的發明」。故事講述一名猶太人於二戰期間被納粹軍捉入集中營，為咗保命就謊稱自己係個波斯人，點知遇著一個夢想戰後去伊朗開餐廳、想學波斯語嘅軍官，雖然唔使死，但就要喺集中營中教呢位軍官講波斯語。同樣係為咗保命，呢名猶太人就開始利用集中營關押嘅猶大人名，創建出屬於自己嘅「波斯語」。

主角「之堯」 (紐夏皮禮斯比士卡約飾)

納粹營長高克 (拉斯艾丁格飾)

縱然電影故事主題都係二戰、集中營、納粹、猶太人，但與《舒特拉的名單》等作品不同嘅係，戲中每一個人都難以區分好壞，主管集中營嘅納粹軍官固然要為猶太人嘅死負上責任，但有住樸素素夢想嘅佢亦非冷血無情之人，會盡方法保護主角，甚至會作詩表達對生命嘅嚮往；主角用盡一切方法保命係人之常情，但佢曾間接害死集中營中嘅猶太人，亦非能夠一力拯救眾人的英雄——簡單黎講，就係大家都係處身於殘忍戰爭中嘅普通人。

《波斯密語》曾代表白俄羅斯參加今屆奧斯卡最佳國際電影，但由於製作團隊中嘅白俄羅人不足，最後被取消資格。電影亦曾參加去年柏林影展。