相信大家都知道經典喪屍生存遊戲《Left 4 Dead》當年有幾紅，差唔多入親網吧都見到有人玩緊。時隔十多年，《L4D》系列開發團隊Turtle Rock Studios就喺上年宣布推出新作《Back 4 Blood》，除咗延續《L4D》精神之外，更加入多種全新元素。經過一年時間開發製作，近日官方終於確實遊戲將於10月13日正式發售。

《B4B》世界觀同樣設定喺喪屍橫行嘅末日背景，成個世界充滿稱為「The Ridden」嘅喪屍，玩家將會扮演有免疫力嘅「Cleaners」抵抗喪屍。同舊作一樣，《B4B》同樣採用4人制模式，玩家可以玩單機模式或者同其他3位朋友一齊對抗喪屍。

《B4B》除咗有類似《L4D》嘅特殊感染者之外，每位「Cleaners」都有各自嘅初始輔助武器同特性，例如某啲角色會跑得快啲、近戰傷害會高啲等等。

不過講到最大改變莫過於加入咗全新嘅卡牌系統，每一關開始之前都有提示下關會有咩敵人同關卡情報，玩家可以喺開戰之前用各種卡牌砌一套卡牌組獲得特殊能力，例如增加攻擊力、血量、體力等等，為遊戲增添更多樂趣。

《Back 4 Blood》預計今年10月13日，於PC、PS5、PS4、Xbox One、Xbox Series X/S多個平台同時發售。

資料來源：IGN、VGC