近年Nike廣告除咗直接推銷產品外，仲好鍾意透過社會議題帶出正面訊息。最近日本Nike就推出一條名為「New Girl/Play New」嘅廣告片，向觀眾揭示日本女性受盡歧視，同時帶出女性都可以打固有破刻板印象，活出真我，相當正面。可惜日本網民就唔多Like，認為廣告係影射緊日本人性別歧視，並將日本「羞家」一面公諸於世。

廣告開頭就講述一位準媽媽照超聲波，並得知肚內BB係一個女仔，雖然佢同屋企人第一時間反應得好開心，笑到見牙唔見眼，但一諗到女性喺日本長大會受盡歧視就開始面有難色。其後畫面就切換到各種女性歧視情景，例如女仔喺晚夜獨自走返屋企嗰陣好驚咁扭轉頭望有冇變態佬跟蹤、女仔可以一齊開會但唔準發言、旁白亦道出一句「日本女性平均工作收入比男性少43.7%」。突然準媽媽就講咗句「女性都可以做任何事情！」，畫面就可以切換到多位日本女性運動員畫面，從而帶出女性都可以打突刻板印象嘅正面訊息。

雖然條廣告無非係想帶出女性都可以活出真我，但因為片中冇介紹歧視原因，唔少網民都唔明Nike點解要拍呢種廣告，認為咁樣做喺影射日本存在性別歧視問題，將「羞家」嘅一面公諸於世，即使段廣告係呼籲大家消除對女性嘅成見，但條片本身就歧視緊日本人，更質疑廣告究竟係咪日本人製作。截至目前，段廣告錄得4,000幾個dislike同1,600個like，約有1,100萬次觀看次數。

其實日本Nike廣告都唔係第一次惹起爭議，之前就因為揭示日本種族歧視問題，而被鬧爆影射日本人種族歧視非裔人士及韓國人，用外國人嘅偏見眼光醜化日本，更一度引起抵制浪潮。

資料來源：Youtube@NIKE JAPAN