E3遊戲展預熱Show「Summer Game Fest」於今日稍早正式登場，知名製作人小島秀夫以視像方式宣布將於PS5推出新作《死亡擱淺 導演剪輯版》，並公開首條預告片，不過就冇講公開發售日期。

從預告片可以見到《死亡擱淺》送貨員Sam，潛入一個堆滿屍體嘅地下設施，不過就因為見到大廳有多位士兵持槍巡邏，於是目光就轉投身邊一個印有快遞公司「Fragile Express」Logo嘅紙箱，並將箱內所有嘢倒晒出嚟，再自己跳入個紙箱入面，睇落Sam好似打算用個箱匿埋潛入敵陣，不過佢諗咗一陣就打消念頭，放返好個箱。熟悉小島秀夫作品嘅朋友，就睇得出呢一幕係向《Metal Gear Solid》嘅Solid Snake致敬，因為佢就試過用紙箱潛行。

小島秀夫表示自己總係想加入一啲社會元素作為遊戲基礎，等玩家會思考更多當今發生緊嘅事。（圖片截自：Youtube）

小島秀夫就冇透露遊戲具體劇情，甚至連預計發售日都冇講，知道新作將以4K/60FPS效能登陸PS5平台，預告片開頭亦有說明條片喺錄製自PS5，相信嚟緊幾個禮拜再會有更多消息傳出，有興趣嘅朋友記得密切關注。

資料來源：gamesradar